1Ki 5 | NdeIBE | STEP | Kwathi uHiramu inkosi yaseThire esizwa ukuthi uSolomoni ugcotshwe ukuba abe yinkosi athathe isihlalo sikayise, wathumela amanxusa akhe kuSolomoni njengoba wayevele ezwanana loDavida.

1 Kings 5

Amalungiselelo Okwakhiwa kweThempeli

1 Kwathi uHiramu inkosi yaseThire esizwa ukuthi uSolomoni ugcotshwe ukuba abe yinkosi athathe isihlalo sikayise, wathumela amanxusa akhe kuSolomoni njengoba wayevele ezwanana loDavida. 2 Yena uSolomoni waphendula uHiramu wathi:

3 “Wena uyakwazi ukuthi ngenxa yezimpi ebezilwiwa ubaba uDavida kenelisanga ukwakha ithempeli leBizo likaJehova uNkulunkulu wakhe uJehova waze wamnqobela izitha zakhe. 4 Kodwa khathesi uJehova uNkulunkulu wami ungiphe ukuthula nxa zonke, ngakho akulasitha loba umonakalo. 5 Ngizimisele, ngenxa yalokho, ukwakha ithempeli leBizo likaJehova uNkulunkulu wami, njengoba watshela ubaba uDavida wathi, ‘Indodana yakho engizayibeka esihlalweni sakho sobukhosi izakwakhela iBizo lami ithempeli.’

6 “Khupha-ke iziqondiso zokuthi ngiganyulelwe izihlahla zomsedari waseLebhanoni. Amadoda avela kimi azasebenza kanye lawe, njalo amadoda avela kuwe ngizawaholisa leloholo ozalitsho wena. Uyakwazi ukuthi asilabo abawaziyo lowomsebenzi ngobuciko obungalingana lobamaSidoni.”

7 UHiramu wathi esizwa ilizwi elivela kuSolomoni, wajabula kakhulu wathi, “Udumo kalube kuJehova lamuhla, ngoba unike uDavida indodana ehlakaniphileyo ezabusa lesisizwe esikhulu.”

8 Ngakho uHiramu wathumela ilizwi kuSolomoni wathi: “Ngilitholile ilizwi ongithumele lona njalo ngizakwenza konke okuzakuzuzisa izigodo zesihlahla somsedari lesohlobo lwephayini. 9 Amadoda ngapha ngakimi azagamula ahudule izigodo azifikise elwandle, ngibe sengizehlisa ngemikolo ngize ngiyezifikisa lapha ozakutsho khona. Kulapho engizazehlukanisa khona wena ube usuzithathela khonapho uhambe lazo. Wena uzagcwalisa isifiso sami ngokunginika isiqiniselo sokuthi uzanginika ukudla komdlunkulu wami ukuze ungawelwa yindlala.”

10 Ngalindlela uHiramu walethela uSolomoni izigodo zesihlahla somsedari kanye lesephayini ayezifuna, 11 kanti njalo yena uSolomoni wapha uHiramu ingqoloyi elingana amakhora azinkulungwane ezingamatshumi amabili yomndlunkulu, phezu kwamafutha acengekileyo awedira angamatanka ayizinkulungwane ezingamatshumi amabili iminyaka leminyaka. 12 UJehova wapha uSolomoni ingqondo ekhaliphileyo njengokumethembisa kwakhe. Kwaba lokuthula ebudlelwaneni bukaHiramu loSolomoni, kwathi bubili babo baba lesibopho sabo sokuhlalisana ngokuthula.

13 INkosi uSolomoni yabutha izibhalwa zokusebenza elizweni lonke lako-Israyeli – ezazizinkulungwane ezingamatshumi amathathu.

14 Wayezithumela eLebhanoni lezizibhalwa ngezigaba zabantu abazinkulungwane ezilitshumi izopho ngezopho ngenyanga, kuyikuthi lezizibhalwa zazisebenza eLebhanoni inyanga yonke zibe seziphumula ekhaya okwezinyanga ezimbili. U-Adoniramu nguye owayephethe labo ababuthwa babayizibhalwa zomsebenzi. 15 USolomoni wayelabantu bokuthwala abazinkulungwane ezingamatshumi ayisikhombisa kanye lababebaza amatshe abazinkulungwane ezingamatshumi aficamunye ezintabeni, 16 kanye lababekhangele abasebenzayo abangamakhulu amathathu lantathu lababebona ngokuqhubeka komsebenzi beqondisa izisebenzi. 17 Ngeziqondiso zenkosi basusa izinkalakatha zamatshe amahle ukuze kube lamatshe amahle okwakhisa ngawo isisekelo sethempeli esilohlonzi.

18 Izingcitshi zokubaza zikaSolomoni lezikaHiramu lamaGebhali babaza balungisa izigodo lamatshe kusakhiwa ithempeli.